Act 15 | NdeIBE | STEP | Amadoda athile eza e-Antiyokhi evela eJudiya afika afundisa abazalwane esithi: “Ngaphandle kokuthi lisokwe ngendlela yomkhuba eyafundiswa nguMosi lingeke lisindiswe.”

Acts 15

Umhlangano Omkhulu EJerusalema

1 Amadoda athile eza e-Antiyokhi evela eJudiya afika afundisa abazalwane esithi: “Ngaphandle kokuthi lisokwe ngendlela yomkhuba eyafundiswa nguMosi lingeke lisindiswe.” 2 Lokhu kwenza uPhawuli loBhanaba baphikisana labo kakhulu. Yikho uPhawuli loBhanaba bakhethwa kanye lamanye amakholwa ukuthi baye eJerusalema ukuyabona abaphostoli labadala ngalolu udaba.

3 Ibandla labavalelisa. Bathi bedabula eFenikhiya leSamariya balandisa ngokuthi abeZizwe base bephendukile. Indaba le yathokozisa bonke abazalwane. 4 Bafika eJerusalema bemukelwa kuhle libandla langabaphostoli labadala, bababikela konke uNkulunkulu ayekwenzile ngabo.

5 Kwasekusithi abanye bamakholwa ababe ngabebandla labaFarisi bema bathi, “AbeZizwe bamele basokwe njalo batshelwe ukuthi balandele umthetho kaMosi.”

6 Abaphostoli labadala bahlangana bakhuluma ngale indaba. 7 Ngemuva kokuphikisana okukhulu uPhethro wasukuma wakhuluma kubo wathi: “Bazalwane, liyakwazi ukuthi esikhathini esidlulileyo uNkulunkulu wangikhetha phakathi kwenu ukuthi abeZizwe bezwe kwezami izindebe ilizwi levangeli bakholwe.

8 UNkulunkulu owazi inhliziyo watshengisa ukuthi uyabemukela ngokubapha uMoya oNgcwele, njengalokhu akwenzayo kithi.

9 Kenzanga umahluko phakathi kwethu labo, ngokuba wahlanza izinhliziyo zabo ngokukholwa.

10 Pho-ke lizamelani ukulinga uNkulunkulu ngokwethesa abafundi ijogwe thina labokhokho bethu esehluleka ukulithwala?

11 Hatshi! Sikholwa ukuthi sisindiswa ngomusa weNkosi uJesu, njengabo labo.”

12 Wonke umhlangano wathula zwi balalela uBhanaba loPhawuli belandisa ngemimangaliso lezimanga uNkulunkulu ayezenzile kwabeZizwe ngabo. 13 Bathi sebeqedile uJakhobe wakhuluma wathi: “Bazalwane, ake lingilalele.

14 USimoni usesilandisele ngokuthi ekuqaleni uNkulunkulu watshengisa njani ukunakekela kwakhe abeZizwe ngokukhetha phakathi kwabo abantu ukuba babe ngabakhe. 15 Amazwi abaphrofethi ayavumelana lalokhu, njengalokhu kulotshiwe kuthiwa:

16 “ ‘Ngemva kwalokhu ngizabuya ngakhe kutsha indlu kaDavida ewileyo. Amanxiwa ayo ngizawavuselela, njalo ngizayimisa kutsha,

17 ukwenzela ukuthi lonke uluntu luyidinge iNkosi, kanye labeZizwe abaziwa ngebizo lami, kutsho iNkosi eyenzayo lezizinto,

18 ezivele zisaziwa kusukela ekadeni.’

19 “Yikho ngokubona kwami, kakumelanga sikwenze kube lukhuni kwabe-Zizwe asebephendukela kuNkulunkulu. 20 Esikhundleni salokho kasibalobeleni sibatshele ukuthi kabaxwaye ukudla okungcoliswe yizithombe, lokuphinga, lenyama yenyamazana ekhanyiweyo lobubende.

21 Phela uMosi sekwatshunyayelwa ngaye kuwo wonke amadolobho kusukela kudaladala njalo kufundwa ngaye emasinagogeni amaSabatha wonke.”

Incwadi Yomhlangano Omkhulu Kumakholwa Abezizwe

22 Abaphostoli labadala kanye lebandla lonke bamisa ukukhetha abanye babo babathume e-Antiyokhi loPhawuli loBhanaba. Bakhetha uJuda owayethiwa nguBhasaba, loSila, la engamadoda amabili ayengabakhokheli kubazalwane. 23 Babaphathisa incwadi le: “Abaphostoli labadala, abazalwane benu, KwabeZizwe abakholwayo e-Antiyokhi, laseSiriya laseKhilikhiya: Siyalibingelela.

24 Sesizwile ukuthi bakhona abasuka kithi bengelamvumo yethu bafika balidunga, bekhathaza izingqondo zenu ngalokho ababekutsho. 25 Ngakho sivumelene sonke ukukhetha amadoda athile siwathumele kini labangane bethu abathandekayo, uBhanaba loPhawuli – 26 amadoda adele izimpilo zawo ngenxa yebizo leNkosi yethu uJesu Khristu. 27 Ngakho sithumela uJuda loSila ukugcwalisa ngomlomo lokhu esikulobayo. 28 Kubonakele kufanele kuMoya oNgcwele lakithi ukuthi singalisindisi ngalutho bani ngaphandle kwezimiso ezilandelayo: 29 Xwayani ukudla okunikelwe izithombe, ububende, inyama yenyamazana ekhanyiweyo kanye lokuphinga. Lizabe lenze kuhle uma lizixwaya lezizinto. Salani kuhle.”

30 Bawavalelisa amadoda bahamba baya e-Antiyokhi, lapho abafika bahlanganisa ibandla ndawonye bayethula incwadi. 31 Abantu bayibala bathokoza ngenxa yamazwi ayo aqinisayo. 32 UJuda loSila, bona ngokwabo ababengabaphrofethi, bakhuluma okunengi ukukhuthaza lokuqinisa abazalwane.

33 Sebehlale isikhathi esithile khonapho, abazalwane babavalelisa ngesibusiso sokuthula, sebebuyela kulabo ababathumayo. ( 34 Kodwa uSila wakhetha ukusala khona.)

35 Kodwa uPhawuli loBhanaba basala e-Antiyokhi, lapho bona kanye labanye abanengi bafundisa njalo batshumayela ilizwi leNkosi.

Ukungavumelani KukaPhawuli LoBhanaba

36 Sekungesinye isikhathi esiphambili uPhawuli wathi kuBhanaba, “Kasibuyele emuva siyobona abazalwane emadolobheni wonke esitshumayele khona ilizwi leNkosi siyebona ukuthi baqhuba njani.” 37 UBhanaba wayefuna ukuthi bahambe loJohane, owayethiwa nguMakho, 38 kodwa uPhawuli wakubona kungafanele ukuhamba laye ngoba wayeke wabafulathela besePhamfiliya kaze aqhubeka labo emsebenzini. 39 Baphikisana kakubi baze bacina betshiyana. UBhanaba wamthatha uMakho bawelela eKhuphro, 40 kodwa uPhawuli wakhetha ukuhamba loSila, basuka bebekwe ngabazalwane emuseni weNkosi. 41 Wahamba phakathi kweSiriya leKhilikhiya eqinisa amabandla.